«Առողջ սնունդ՝ առողջ սիրտ» ծրագիրը

Հայկական բժշկական ասոցիացիան սկսում է «Առողջ սնունդ՝ առողջ սիրտ» ծրագրի իրականացումը, երեքշաբթի «Նովոստի-Արմենիա» գործակալությանը հաղորդեցին Ասոցիացիայից։

Ծրագրի նպատակն է ճիշտ կենսակերպի, մասնավորապես,  առողջ սննդի վերաբերյալ բնակչության բազմակողմանի իրազեկումը։
 
Հաղորդարգրության համաձայն, ծրագիրը ներառում է առողջ կենսակերպի ներդրման միջոցառումների ամբողջական փաթեթ, ինչպես նաև հատուկ մակնշման միջոցով հասարակության իրազեկում այն սննդամթերքի մասին, որոնց օգտագործումը վնասակար չէ առողջությանը։

 
Ծրագրի առաջին փուլում ասոցիացիան որոշել է հսկողություն իրականացնել սննդամթերքում ճարպի, շաքարի և աղի պարունակության նկատմամբ, քանի որ դրանք հանդիսանում են սրտանոթային հիվանդությունների առաջացման ամենատարածված և վտանգավոր գործոնները։

«Հայկական բժշկական ասոցիացիան տագնապով տեղեկացնում է, որ Հայաստանում շարունակվում է սրտանոթային հիվանդությունների աճն ու երիտասարդացումը, բարձրանում է այդ հիվանդությունների տեսակարար կշիռն ընդհանուր հիվանդության և մահացության կառուցվածքում»,- ասվում է հաղորդագրության մեջ։

ՀԱԲ-ն 2010թ. հոկտեմբերին 1000 դպրոցական տարիքի երեխաների շրջանում կատարել է «Երեխաների օրգանիզմի բնականոն աճն ապահովող սննդային գործոնների գնահատումը Երևանում» լայնածավալ հետազոտությունը։

Հետազոտության արդյունքները ևս փաստում են, որ երեխաների մոտ բարձր տարածվածություն ունեն ավելցուկային քաշն ու ճարպակալումը, որի պայմանավորող գործոններից են առողջ սննդակարգի մշակույթի բացակայությունն ու իմացության անբավարար աստիճանը։

Հարցեր, պատասխաններ, մեկնաբանություններ